माडीमा बन्ने भयो अयोध्याधाम


ओकेजनता डेस्क
१४ आश्विन २०७७, बुधबार

काठमाडौं । प्रधानमन्त्री केपी शर्मा ओलीको निर्देशनमा चितवनको माडी नगरपालिकाले अयोध्याधाम निर्माणका लागि जग्गा छुट्याएको छ ।

मंगलबार बसेको कार्यपालिका बैठकले अयोध्याधाम निर्माणका लागि जमिनको टुङ्गो लगाउँदै एकसय बिगाहा जग्गा छुट्याएको हो ।

नगरप्रमुख ठाकुरप्रसाद ढकालले वडा नम्बर ८ र ९ सिमानामा अयोध्यापुरीधाम निर्माणका लागि हालको अयोध्यापुरी उद्यानको एकसय बिगाहा जग्गा छुट्याइएको बताए ।

उनले सो जग्गामा प्राविधिक अथवा अन्य कारणले समस्या भए वडा नम्बर ८ को दक्षिण अयोध्यापुरीमा पनि करिब पचास बिगाहा जग्गा प्रयोगमा ल्याउन सकिने बताए ।

यस्तै वडा नम्बर १ को पाण्डवनगर, वडा नम्बर ७ को देवेन्द्रपुर दक्षिण शनिमन्दिर क्षेत्र र वडा नम्बर ९ को गणेशकुञ्जमा समेत जग्गाको व्यवस्था गर्ने निर्णय भएको ढकालले बताए ।

अयोध्याधाम निर्माणका लागि गुरुयोजना निर्माण भएको भन्दै उनले डीपीआर (विस्तृत आयोजना प्रतिवेदन) निर्माण छिट्टै अघि बढ्ने बताए ।

माडी नगरपालिकाका उपप्रमुख ताराकुमारी काजी महतोले निजी जग्गाहरु उपलब्ध गराउन स्थानीय सबैजना तत्पर रहेको बताए ।

अयोध्याधाम निर्माण हुने भएपछि सबै माडीबासी उत्साहित भएको उनको भनाइ छ । माडी–७ का केही स्थानीयबासीले धाम निर्माणका लागि करिब १५ बिगाहा जमिन निःशुल्क दिने घोषणा गरिसकेका छन् ।

अयोध्याधाम खोज तथा अनुसन्धान समिति माडीका संयोजक नारदमणि पौडेलले कार्यपालिकाको बैठकको निर्णय स्वागतयोग्य रहेको बताए ।

जमिनको टुङ्गो नलागेका कारण काममा अवरोध हुने अवस्थामा कार्यपालिकाको निर्णयले काम अगाडि बढाउन सहज भएको र केही दिनमै अयोध्याधाम निर्माणको चरणमा प्रवेश गर्ने बताए ।

प्रधानमन्त्री केपी शर्मा ओलीले भानु जयन्तीको अवसरमा आयोजित कार्यक्रममा भगवान् राम नेपालकै माडीको अयोध्यामा जन्मिएको तथ्य प्रमाण रहेको भनेपछि यस विषयले राष्ट्रिय र अन्तर्राष्ट्रियरूपमा चर्चा पाएको थियो ।

माडीका जनप्रतिनिधिलाई भेटेर प्रधानमन्त्री ओलीले अयोध्याधामको निर्माण थाल्न निर्देशनसमेत दिएका थिए ।

प्रतिक्रिया दिनुहोस्