कास्कीमा एमाले यस्तो देखियो, नेकपा एस शून्य


ओकेजनता डेस्क
१९ भाद्र २०७८, शनिबार

काठमाडौं । नेकपा एमाले कास्कीबाट निर्वाचित जनप्रतिनिधिहरू नेकपा एमालेमै रहने भएका छन् ।

कास्कीमा शुक्रबार भएको निर्वाचित जनप्रतिनिधिहरूको भेलामा सबै जनप्रतिनिधिहरू नेकपा एमालेमा रहने बताएका हुन् । भेलामा कास्कीका ४ गाउँपालीका र पोखरा महानगरपालिकाका जननिर्वाचित प्रतिनिधिहरू सहभागी थिए ।

कास्कीमा ५ पालिकामध्ये अन्नपूर्ण गाउँपालिकामा अध्यक्ष बाहेक सबै पालिकामा अध्यक्ष र उपाध्यक्ष नेकपा एमालेले जितेको थियो । पोखरा महानगरपालिकाका मेयर मानबहादुर जिसी, उपमेयर मञ्जुदेवी गुरुङसहित २२ वटा वडाध्यक्ष नेकपा एमालेले जितेको थियो ।

महानगरका सबै जनप्रतिनिधि नेकपा एमालेमै रहेको पोखरा महानगरपालिका उपप्रमुख मन्जुदेबि गुरुङले दाबी गरिन् । महानगरमा निर्वाचित १ सय ५२ जना सबै जनप्रतिनिधि सबै नेकपा एमालेमा रहेको उनले बताइन् ।

रुपा गाउँपालिका अध्यक्ष नवराज ओझा र उपाध्यक्ष लालसुब्बा गुरुङ सहित जितेका वडाध्यक्ष र सदस्यहरू नेकपा एमालेमै रहने भएका छन् । गाउँपालिका भित्रका सबै नेकपा एमालेमा एक ढिक्का रहेको रुपा गाउँपालिकाका अध्यक्ष नवराज ओझाले जानकारी दिए ।

मादी गाउँपालिकाका अध्यक्ष बेदबहादुर गुरुङ र उपाध्यक्ष विष्णुमाया आचार्य पौडेलसहित सबै जनप्रतिनिधि नेकपा एमालेमै रहेका छन् । एमाले प्रदेश कमिटी सदस्य तथा मादी गाउँपालिका अध्यक्ष बेदबहादुर गुरुङले सबै जना एमालेमा एकताबद्ध रहेको बताए ।

माछापुच्छ्रे गाउँपालिकाका अध्यक्ष कर्णबहादुर गुरुङले सुर्यकै पक्षमा आफू सहितका सबै जनप्रतिनिधि एकताबद्ध रहेको बताए । उपाध्यक्ष कृष्णकुमारी दवाडी सहित सबै वडाध्यक्ष र सदस्यहरूले नेकपा एमालेमै रहने भएका छन् ।

 

यसैगरी अन्नपूर्ण गाउँपालिका उपाध्यक्ष सगुन गुरुङसहित वडाध्य र सदस्यहरूले नेकपा एमाले रोजेका छन् । कास्कीमा एमालेबाट २८१ जना जनप्रतिनिधि रहेका छन् ।

भेलामा सहभागी जनप्रतिनिधिले हस्ताक्षर गर्दै कार्यक्रम सभाहलमा प्रबेश गरेका थिए । भेलालाई नेकपा एमाले केन्द्रिय सदस्य पूर्वमन्त्री खगराज अधिकारी, केन्द्रिय सदस्य सीता गिरी ओली लगायतले सम्बोधन गरेकी थिइन् ।

 

प्रतिक्रिया दिनुहोस्