सोमप्रसाद पाण्डेलगायत यी चारजनाले माधव नेपालको पार्टीमा जान पाएनन्


ओकेजनता डेस्क
९ भाद्र २०७८, बुधबार

काठमाडौं । निर्वाचन आयोगले नेकपा एकीकृत समाजवादी पार्टीमा रहन चाहेको भन्दै निवेदन दिएका चार जना सांसदको सनाखत गर्न अस्वीकार गरेको छ।

पार्टी दर्ताका लागि पेश गरेको निवेदनमा नाम र हस्ताक्षर नभएको भन्दै आयोगले शारदा भट्ट, माया ज्ञवाली, सोमप्रसाद पाण्डे र तुलसा थापाको सनाखत गर्न नमानेको हो।

यद्यपि पार्टी विभाजन भएको निर्णयमा उनीहरुले समाजवादी पार्टीमा रहनका लागि निवेदन दिएको भन्ने कुरा उल्लेख गरी संघीय संसदलाई जानकारी गराउने सहमति भएको नेकपा एकीकृत समाजवादीका नेता जीवनराम श्रेष्ठले जानकारी दिए।

आयोगले पार्टी विभाजनको निर्णय आजै गर्ने जानकारी दिएको छ। प्रमुख निर्वाचन आयुक्त दिनेश थपलियाले सकेसम्म एकीकृत समाजवादी पार्टी दर्ताको प्रमाण पत्र पनि आजै दिने बताए।

प्रस्तावित नेकपा एकीकृत समाजवादीको पक्षमा ३० सांसद र ५४ जना केन्द्रीय सदस्यहरुले सनाखत गरेका छन्।

अध्यक्ष माधवकुमार नेपालसहितका नेताहरुले बुधबार आयोगको कार्यालयमै पुगेर सनाखत गरेका हुन्। वरिष्ठ नेता झलनाथ खनालले भने दिल्लीबाटै भर्चुअल माध्यमबाट सनाखत गरेका छन्।

प्रतिक्रिया दिनुहोस्