ओली सरकारका यी दुई मन्त्रीको बिदाई


ओकेजनता डेस्क
२१ चैत्र २०७७, शनिबार

काठमाडौं । केपी ओली नेतृत्वको सरकार ढल्छ वा रहन्छ भन्नेमा अन्योल कायमै छ । दलहरुबीच सरकार गठनको रस्साकस्सी जारी रहे पनि सार्थक परिणाम हात लागिसकेको छैन ।

ओली सरकार कायमै रहे पनि वर्तमान सरकारमा रहेका दुई मन्त्री भने आगामी असारमा बिदा हुनुपर्ने बाध्यात्मक अवस्था देखिएको छ ।

खानेपानी मन्त्री मणिचन्द्र थापा र युवा तथा खेलकुद मन्त्री दावा लामा तामाङले ओली नेतृत्वको सरकारमा ६ महिनाभन्दा बढी सामेल हुन नपाउने भएका हुन् ।

संवैधानिक प्रावधानअनुसार संघीय सदस्य रहेको कुनै पनि व्यक्ति प्रधानमन्त्रीको सिफारिसमा मन्त्रिपरिषदमा राष्ट्रपतिबाट नियुक्त हुन सक्ने भए पनि उसले ६ महिनाभित्र संघीय संसदको सदस्यता हासिल गरिसक्नुपर्ने हुन्छ ।

प्रधानमन्त्री ओलीले गत पुस ५ गते प्रतिनिधिसभा विघटन गरेपछि मन्त्रिपरिषद पुनर्गठन गर्दा मन्त्रिपरिषदमा सामेल गरेका थापा र तामाङ आगामी असारभित्र संसदको सदस्य हुन नसके सरकारबाट अनिवार्यरुपमा बिदा लिनुपर्नेछ ।

संविधानको धारा ७८ को उपधारा (१)मा ‘राष्ट्रपतिले प्रधानमन्त्रीको सिफारिसमा संघीय संसद्को सदस्य नभएको कुनै व्यक्तिलाई मन्त्री पदमा नियुक्त गर्न सक्नेछ’ भन्ने उल्लेख छ । तर, सांसद नरहे पनि मन्त्रीमा शपथ लिएको व्यक्तिले ६ महिनाभित्र संघीय संसद्को सदस्य बन्नुपर्ने संवैधानिक प्रावधान छ ।

६ महिनाभित्र ऊ सांसद बन्न नसके त्यो प्रतिनिधिसभाको कार्यकालभर मन्त्री बन्न नपाउने व्यवस्था छ । सोही प्रावधानअनुसार मन्त्रीद्वय थापा र तामाङले असार उता सरकारमा स्थान नपाउने भएका हुन् ।

प्रतिक्रिया दिनुहोस्