विप्लवले अहिलेसम्म यी नेतालाई भेटे, यस्तो छ रणनीति


ओकेजनता डेस्क
२२ फाल्गुन २०७७, शनिबार

काठमाडौं । सरकारसँग सहमति भएपछि खुला भएका नेत्रविक्रम चन्द ‘विप्लव’ले राजनीतिक सक्रियता बढाएका छन् ।

सरकारसँग तीन बुदेँ सहमति गरेको भोलिपल्ट शनिबार बिहानै विप्लवले गृहमन्त्री रामबहादुर थापा ‘बादल’सँग भेट गरेका थिए ।

गृहमन्त्रीसँग कार्यकर्ता रिहाइबारे कुरागरेपछि विप्लव नख्खु कारागारमा रहेका नेता हेमन्तप्रकाश वलीलाई भेट्न पुगे । यही सिलसिलामा विप्लवले आफ्ना राजनीतिक गुरु मोहन बैद्य ‘किरण’सँग पनि भेटघाट गर्ने भएका छन् । यो भेट संयुक्त रणनीतिक मोर्चाको बैठकका सन्दर्भमा हुने भएको हो ।

मोर्चामा रहेका विश्वभक्त दुलाल ‘आहुती’ले विप्लव खुला राजनीतिमा आएको परिवेशमा यसबारे छलफल हुन लागेको बताए। ‘एकछिन भेटघाट गर्ने कार्यक्रम छ,’ उनले भने, ‘उहाँ खुला भएको हुनाले भेटघाट गर्ने कार्यक्रम राखिएको हो ।’

छलफल बैद्य नेतृत्वको पार्टी कार्यालय रहेको कुपण्डोलस्थित नेवाः राज्य कार्यालयमा हुन लागेको हो। अघिल्लो महिना संसद बाहिर रहेका चार कम्युनिस्ट पार्टीको संयुक्त रणनीतिक मोर्चा बनेको थियो ।

उक्त मोर्चामा बैद्य नेतृत्वको नेकपा– क्रान्तिकारी माओवादी, विप्लव नेतृत्वको नेकपा, आहुति नेतृत्वको वैज्ञानिक समाजवादी क्रान्तिकारी पार्टी र ऋषि कट्टेल नेतृत्वको नेकपा रहेका छन् ।

प्रतिक्रिया दिनुहोस्