२३ गतेको संसदमा यसरी बस्नेछन् नेकपाका दुवै पक्ष


ओकेजनता डेस्क
२२ फाल्गुन २०७७, शनिबार

काठमाडौं । दाहाल–नेपाल पक्षका सांसद आइतबारबाट सुुरु हुने संसद् अधिवेशनमा सत्तापक्षको लहरमा नै बस्ने भएका छन् ।

राजनीतिक रूपमा पार्टी विभाजन भए पनि निर्वाचन आयोगले पार्टी विभाजनको निर्णय नगरेका कारण उनीहरू एकै लहरमा बस्नुपर्ने भएको हो । नेपाल कम्युनिस्ट पार्टीको वैधानिकताको मुद्दा निर्वाचन आयोगबाट निर्णय नहुँदा ओली पक्ष र दाहाल–नेपाल पक्षका सांसदहरू एकै लहमा बस्नुपर्ने संसद् सचिवालयले जनाएको छ ।

‘पार्टी विभाजन वा फरक दल भएको जानकारी संसद्मा नआएसम्म हामीले सत्ता पक्षका सांसदहरू सबैलाई एकै स्थानमा बस्ने व्यवस्था मिलाएका छौं,’ संसद सचिवालयका प्रवक्ता रोजनाथ पाण्डेले भने, ‘संसद्मा एउटै दल नेपाल कम्युनिस्ट पार्टी (नेकपा)को सांसदको रूपमा उहाँहरूलाई एकै स्थानमा बस्ने व्यवस्था मिलाएका हौं ।’

राष्ट्रियसभाको बैठकमा पनि एकै लहरमा बस्ने व्यवस्था मिलाइएका कारण दुवै पक्षका सांसदहरूसँगै बसेका थिए । पार्टीको शीर्ष नेता तथा पूर्वप्रधानमन्त्रीहरूलाई छुट्टै बस्ने व्यवस्था गरिएको संसद् सचिवालयले जनाएको छ । यो समाचार आजको राजधानी दैनिकमा सविन शर्माले लेखेका छन् ।

केही दिनअघि सिभिल अस्पतालमा कोरोनाविरुद्धको खोप लगाउन आएका नेकपा दुवै पक्षका नेता एक अर्कासँग बोलचल गरेका थिएनन् । ओली सरकारका उपप्रधानमन्त्री ईश्वर पोखरेल र दाहाल–नेपाल पक्षका नेता योगेश भट्टराई एकआपसमा बोलेनन् ।

उनीहरु करिब २० मिनेट एकै स्थानमा बसेका थिए । पोखरेल र भट्टराई मात्रै होइन यतिबेला नेकपा दुवै पक्षका सांसद एकअर्कालाई गा ली गर्नै उत्रिएका छन् ।

भोलि बस्ने संसदमा पनि यस्तै दृष्य देखिने त होइन ?

प्रतिक्रिया दिनुहोस्