संसदमा अविश्वासको प्रस्तावबारे कांग्रेसमा एकमत


ओकेजनता डेस्क
१९ फाल्गुन २०७७, बुधबार

काठमाडौं । नेकपा विवाद हेर र पर्खको अवस्थामा रहेको प्रतिपक्षी दल नेपाली कांग्रेस यतिबेला अग्रसर देखिएको छ ।

प्रधानमन्त्री केपी शर्मा ओलीले नेकपा विवादलाई अड्काएर आफू नेतृत्वको सरकारलाई टिकाइराख्न चाहेपछि काँग्रेसले पूर्व निर्णयबाट पछि हट्न सक्ने संकेत दिएको छ ।

प्रतिनिधिसभा विघटनको निर्णय बदर भएपछि गत बिहीबार बसेको काँग्रेस पदाधिकारी बैठकले नेकपा वैधानिकरुपमा विभाजित भइनसकेको अवस्थामा दुवै पक्षलाई निषेध नगरी अघि बढ्ने निर्णय लिएको थियो ।

काँग्रेसका एक नेताका अनुसार त्यसको अर्थ ओली सरकारलाई निरन्तरता दिने भन्ने थिएन ।

‘ओलीले आफ्नो विकल्प अघि सार्ने विषयमा केही कदम चाल्लान् भन्ने विश्वास थियो ।

तर उनका पछिल्ला गतिविधिले दाहाल–नेपाल समूहलाई गलाएर, थकाएर आफ्नै नेतृत्वको सरकारलाई निरन्तरता दिन खोजेको देखियो,’ ती नेताले भने, ‘अब काँग्रेसले पनि रणनीति परिवर्तन गर्नुपर्छ ।’

काँग्रेसले अब लिने विकल्प भनेको दाहाल–नेपाल समूहसँग मिलेर अविश्वासको प्रस्ताव ल्याउने हो, जुन विषयमा अनौपचारिक संवाद भइरहेको दुवै पक्षका नेता बताउँछन् ।

अर्को विपक्षी दल जनता समाजवादी पार्टी (जसपा) ले प्रतिनिधिसभा विघटनको विरोधमा सडकमा गएका दलहरुबीचकै गठबन्धन प्राकृतिक हुने बताउँदै अविश्वासको प्रस्तावमा हस्ताक्षर गर्ने संकेत दिएको छ ।

अहिले कांग्रेसले प्रतिगमनको पक्षमा जानै नसकिने निर्ण गरेको छ । प्रधानमन्त्री ओली निकट देखिएका कांग्रेस सभापति शेरबहादुर देउवा पार्टीभित्रको दबाब थेग्न नसकेर संसदमा अविश्वासको प्रस्ताव लैजाने मूडमा देखिएका छन् ।

कांग्रेसले अविश्वासको मत दिएमा प्रधानमन्त्री ओलीलाई सकस पर्ने देखिएको छ ।

प्रतिक्रिया दिनुहोस्