ओली पक्षको अभिव्यक्तिपछि निर्वाचन आयोग आक्रोशित


ओकेजनता डेस्क
१६ माघ २०७७, शुक्रबार

काठमाडौं । नेकपा ओली पक्षका नेता सुवासचन्द्र नेम्बाङलगायतले निर्वाचन आयोगले आफूहरुलाई आधिकारिकता दिएको बताएपछि आयोगले नेकपाको कुनै एउटा समूहलाई आधिकारिता प्रदान नगरेको प्रष्ट पारेको छ ।

नेकपाका दुवै गुट कसैलाई पनि आधिकारिकता नदिएको र अबको छलफलबाट त्यसको प्रारम्भ हुने आगोगको भनाइ छ ।

संसद विघटनसँग विभाजित नेकपाको दाहाल–नेपाल पक्षले बहुमत केन्द्रीय सदस्यको बैठक राखेर केपी शर्मा ओलीलाई अध्यक्षबाट हटाएर माधवकुमार नेपाललाई चयन गरेको छ ।

ओली पक्षले भने २०७८ मंसिरमा महाधिवेशन गर्ने गरी केन्द्रीय कमिटी विस्तार गर्दै विवरण अध्यावधिक गर्न निर्वाचन आयोगलाई पत्राचार गरेको थियो ।

तर, माघ ११ मा बसेको निर्वाचन आयोगको बैठकले दुवै पक्षको दाबी अस्वीकार ग¥यो ।

यससँगै कानुनीरुपमा नेकपाको अध्यक्ष ओली र प्रचण्ड रहे भने केन्द्रीय कमिटी ४४१ सदस्यीय नै कायम भयो ।

यो निर्णयसँगै ओली पक्षका नेताहरुले आयोगले ओलीलाई प्रमुख पदाधिकारी मानेकाले आफूहरु आधिकारिक भएको दाबी गरेका थिए । तर आयोगले शुक्रबार दुवै समूहलाई छलफलमा बोलायो ।

यद्यपि दाहाल–नेपाल पक्षले अध्यक्षद्धय राजनीतिक कार्यक्रमका क्रममा उपत्यका बाहिर रहेको भन्दै केही दिन समय दिन आग्रह गरेको छ ।

प्रतिक्रिया दिनुहोस्