वनमन्त्री आले देखेर रुखबिरुवा, जनावर सबै त्रसित छन् : रावल


ओकेजनता डेस्क
९ माघ २०७७, शुक्रबार

काठमाडौं । नेकपा (दाहाल–नेपाल पक्ष)का नेता भीम रावलले चोरको हातमा साँचो रहेकोले शुक्लाफाँटादेखि लालझाडीका रुख त्रसित भएको बताउनुभएको छ ।

वनमन्त्री प्रेम आलेमरलाई लक्षित गर्दै रावलले हालका वनमन्त्रीदेखि रुख, बिरुवा मात्र नभइ जनावर समेत त्रसित भएको बताउनुभयो ।

कञ्चनपुरमा पत्रकार सम्मेलन गर्दै रावलले वन तस्करी र भ्रष्टाचार नगर्न मन्त्री आलेलाई सुझाव दिएकै कारण आफ्नोविरुद्ध लागेको दाबी गर्नुभयो ।

प्रधानमन्त्री केपी शर्मा ओलीको निर्देशनमा मन्त्री आलेले आफूलाई जातीय रुपमा व्याख्या गरेको भन्दै रावलले जात, धर्म भन्दा पनि आफू कर्मले माथि उठेको बताउनुभयो ।

वन तस्कर, भ्रष्टाचारी, सरकारी जमिन हडप्ने मन्त्री भएकै कारण वर्तमान सरकार बदनामको घर भएको रावलको टिप्पणी छ ।

सूर्य चिन्ह नेकपाको संस्थापन पक्ष (दाहाल–नेपाल) कै हुने दाबी गर्दै रावलले ओलीको असंवैधानिक कदमविरुद्धमा सशक्त भएर आन्दोलन गर्नुको विकल्प नभएको बताउनुभयो ।

प्रतिक्रिया दिनुहोस्