सरकारका प्रवक्ता ज्ञवाली भन्छन्– लकडाउन हुन्छ


ओकेजनता डेस्क
२५ आश्विन २०७७, आईतवार

काठमाडौं । सरकारले कोरोना संक्रमण नियन्त्रणका लागि पुनः लकडाउन हुनसक्ने तर्फ सबैलाई सचेत गराएको छ ।

सरकारले गरेका आग्रहको नागरिक स्तरबाट अवज्ञा भए पुनः लक डाउन हुन सक्ने तर्फ सरकारले सचेत गराएको हो ।

सरकारले गरेका आग्रहको नागरिक स्तरबाट अवज्ञा भए पुनः लकडाउन हुन सक्ने तर्फ सरकारले सचेत गराएको छ । नागरिकको जीवनरक्षा सरकारको पहिलो प्राथमिकता भएको भन्दै प्रवक्ता प्रदीप ज्ञवालीले बारम्बारको अपीलले काम नगरे कडा कदम चाल्नुपर्ने अवस्था आउन सक्ने बताउनु भएको हो ।

अहिलेको अवस्थामा लकडाउन र निषेधाज्ञा गर्ने कुरा सरकारको प्राथमिकतामा नरहेको भन्दै उहाँले नागरिक संवेदनशिल नभए लकडाउन गर्न सरकार बाध्य हुने चेतावनी दिनुभएको छ ।

काठमाडौं उपत्यकामा ६० प्रतिशत बढी संक्रमित देखा पर्न थालेको भन्दै प्रवक्ता ज्ञवालीले नागरिकहरुलाई सचेतना अपनाउन अपील गर्नुभएको हो । मन्त्रिपरिषदका निर्णय सार्वजनिक गर्न आयोजित पत्रकार सम्मेलनमा उहाँले संक्रमणको अवस्था जटिल बन्न नदिन सचेत भएर सरकारलाई साथ दिन आग्रह समेत गर्नुभयो ।

दशै, तिहार र छठजस्ता चाडपर्वहरुमा भिडभाड हुने र संक्रमण झन बढ्ने खतरा हुनेतर्फ पनि सबैले ध्यान दिन उहाँले आग्रह गर्नुभयो ।

जेष्ठ नागरिकहरुको सुरक्षा महत्वपूर्ण भएको उल्लेख गर्दै उहाँले सानो लापरवाहीले गर्दा जीवनमा नै जोखिमको अवस्था आउन नदिन आग्रह गर्नुभयो ।

काठमाडौंमा संक्रमणको दर बढीरहेको सन्दर्भमा उहाँले बाँकेको नरैनापुर, उदयपुर र वीरगञ्ज लगायतका क्षेत्रमा संक्रमण नियन्त्रणका लागि स्थानीय जनप्रतिनिधि र सरोकारवालाहरुले खेलेको भुमिकालाई आत्मसाथ गर्दै अगाडी बढ्नुपर्ने बताउनुभयो ।

राजनीतिक र सामाजिक परिवर्तनका लागि महत्वपूर्ण भूमिका खेलेको काठमाडौं महामारी विरुद्धको लडाइमा पछाडी परेको उल्लेख गर्दै उहाँले विगतमा हट स्पट भएका ठाउँमा जनप्रतिनिधिहरुले कोरोना नियन्त्रणमा लिन गरेको असल अभ्यासहरु काठमाडौंमा लागु गर्न जरुरी रहेको बताउनुभयो ।

प्रतिक्रिया दिनुहोस्