बामदेवलाई सकसैसकस, कसियो अर्को गाँठो !


ओकेजनता डेस्क
२१ आश्विन २०७७, बुधबार

काठमाडौं । नेपाल कम्युनिष्ट पार्टी (नेकपा)का उपाध्यक्ष एवम् राष्ट्रियसभा सदस्य बामदेव गौतमलाई अर्को सकस परेको छ । राष्ट्रियसभामा मनोनीत गरेको विषयमा वामदेव गौतमविरुद्ध सर्वोच्च अदालतमा परेको रिट निवेदनको सुनुवाइ कोरोना भाइरसको महामारीका कारण प्रभावित हुने भएको छ ।

न्यायाधीश पुरुषोत्तम भण्डारी कोरोना संक्रमणपछि आइसोलेशनमा बसेका छन् । प्रधानन्यायाधीश चोलेन्द्र शमशेर जबरा यसअघि नै होम–आइसोलेशनमा छन् ।

गएको शुक्रबार वामदेव पक्षका वकिलहरु धेरै भएका कारण सुनुवाई नसकिँदा मुद्दा ‘हेर्दाहेर्दै’ मा राखिएको थियो । बुधबार सुनुवाई हुने भनिएपनि न्यायाधीशहरु नै कोरोना भाइरसबाट संक्रमित भइ आइसोलेशनमा रहेका कारण सम्भव नदेखिएको हो ।

गएको शुक्रबार वामदेवका तर्फबाट पूर्व महान्याधीवक्ताहरु युवराज संग्रौला र राघवलाल वैद्यका साथै शेरबहादुर केसीले बहस गरेका थिए ।

वरिष्ठ अधिवक्ता दिनेश त्रिपाठी र अधिवक्ता बद्रीराज भट्टले गौतमको नियुक्ति बदर गर्न माग गर्दै असोज ५ गते रिट दायर गरेका थिए । रिटको प्रारम्भिक सुनुवाइपछि न्यायाधीश आनन्द मोहन भट्टराईको एकल इजलासले गौतमलाई ‘थप संवैधानिक नियुक्ति नदिन’ र संवैधानिक इजलासमा थप सुनुवाइ गर्न आदेश दिएको थियो ।

त्यसअघिको बुधबार (असोज १४ गते) रिट निवेदकका तर्फबाट त्रिपाठी, अधिवक्ताहरु बद्रीबहादुर कार्की, हरि उप्रेतीलगायतले बहस गरेका थिए । गौतमको तर्फबाट महान्यायाधीवक्ता अग्निप्रसाद खरेलले बहस गरेका थिए ।

प्रतिनिधिसभा चुनावमा बर्दियाबाट पराजित भएका गौतमलाई सरकारको सिफारिसमा राष्ट्रपति विद्यादेवि भण्डारीले असोज १ गते राष्ट्रियसभा सदस्यमा मनोनित गरेकी थिइन् ।

निवेदकले प्रतिनिधिसभामा पराजित भएको व्यक्ति मनोनितको कोटामा राष्ट्रियसभामा जानु संविधान, जनमत विपरीत भएको जिकिर गरेका छन् । जनमत, संविधानवाद्, लोकतान्त्रिक मूल्य मान्यता, नैतिक मूल्यका आधारमा नियुक्ति बदर हुनुपर्ने माग रिटमा गरिएको छ ।

प्रारम्भिक सुनुवाइ गर्दै सर्वोच्चले पराजित व्यक्ति मनोनित हुन सक्ने वा नसक्ने भन्ने विषय ‘गम्भीर संवैधानिक व्याख्या’को विषय भएकाले संवैधानिक इजलासबाट निरुपण गर्न आदेश दिएको थियो ।

कोरोना संक्रमणका कारण बुधबार (आज) अनिश्चित बनेको सो मुद्दाको सुनुवाई आउँदो शुक्रबार पनि हुने सम्भावना देखिँदैन । यो मुद्दाको सुनुवाई दसैँ पछाडिसम्म धकेलिन सक्ने छ ।

प्रतिक्रिया दिनुहोस्