राष्ट्रियसभाको निर्वाचन आज, गठबन्धनको वर्चस्व


ओकेजनता डेस्क
१२ माघ २०७८, बुधबार

काठमाडौं । बुधबार लागि तय भएको राष्ट्रिय सभा निर्वाचनको तयारी पूरा भएको छ । सात वटा प्रदेशमा ८ मतदान स्थलका १४ मतदान केन्द्रमा १९ सिटका लागि मतदान हुँदैछ ।

मतदान स्थलको व्यवस्थापन, मतपत्र तयारी लगाएका काम सम्पन्न भएको निर्वाचन आयोगले जनाएको छ । मतदान स्थलमा बुथ निर्माणको काम, मतदान अधिकृत खटाउने लगायतका काम सम्पन्न भएको आयोगका प्रवक्ता शालिग्राम शर्मा पौडेलले जानकारी दिए । उनले भने–‘निर्वाचनको तयारी पूर्ण रूपमा सम्पन्न भइसकेको छ । बिहान ९ बजेदेखि ३ बजेसम्म मतदान हुन्छ ।’

आयोगले २१ बुँदे स्वास्थ्य मापदण्डहरू तय गरेर निर्वाचन अधिकृतको कार्यालयमा पठाएको छ । सरकार र सीसीएमसीले तयार गरेको स्वास्थ्य मापदण्डका आधारमा आयोगले स्वास्थ्य मापदण्डहरू तयार गरेको छ ।

ती स्वास्थ्य मापदण्डहरू पूर्ण रूपमा पालना गरेर मतदान गर्ने तय गरिएको आयोगका प्रवक्ता शर्माले जानकारी दिए ।

यस्तै निर्वाचन सुरक्षाका लागि सम्बन्धित जिल्ला प्रशासन कार्यालयसँग समन्वय गरिएको छ । उनले भने –‘सुरक्षा व्यवस्थाका लागि गृह मन्त्रालय मार्फत सम्बन्धित जिल्ला प्रशासन कार्यालय मार्फत जिल्ला प्रहरी कार्यालयलाई सुरक्षा व्यवस्था मिलाउनका लागि अनुरोध गरिएको छ । जिल्ला निर्वाचन अधिकारी, प्रमुख जिल्ला अधिकारी, सुरक्षा निकायका सम्पूर्ण पदाधिकारीहरू भएर आवश्यकता अनुसार निर्वाचन सुरक्षा बैठक बसेर सुरक्षाको सबै चाँजोपाँजो पनि मिलाइएको छ ।’

आउँदो फागुन २० गते राष्ट्रिय सभाका १९ सांसदको पदावधि समाप्त हुँदैछ । सो रिक्त हुने स्थानमा एमालेका ८, एकीकृत समाजवादीका ४, माओवादी केन्द्रका ४ र काँग्रेसका ३ सांसद रहेका छ । सो रिक्त रहेको स्थानमा प्रदेश १ बाट ३, प्रदेश नम्बर २ बाट २ , बागमती प्रदेशबाट २, गण्डकीबाट ३, लुम्बिनीबाट ३, कर्णालीबाट ३ र सुदूरपश्चिम प्रदेशबाट ३ गरी १९ सांसद निर्वाचित हुन लागेका हुन् ।

निर्वाचनका लागि आयोगले ७ प्रदेशमा ८ मतदान स्थल तय गरेको छ । जस अनुसार प्रदेश नम्बर १ मा निर्वाचन कार्यालय विराटनगर र बाली संरक्षण प्रयोगशाला विराटनगरमा मतदान स्थल कायम गरिएको छ ।

प्रदेश नम्बर २ मा महेन्द्रनारायण निधि स्मृति भवनमा मतदान स्थल तय गरिएको छ । यता बागमती प्रदेशमा औद्योगिक क्षेत्र व्यवस्थापन लिमिटेडको सभागृह, गण्डकी प्रदेशमा प्रदेश निर्वाचन कार्यालय, लुम्बिनी प्रदेशमा दाङको घोराहीमा रहेको कर्मचारी मिलन केन्द्र भवनमा कर्णाली प्रदेशमा प्रदेश निर्वाचन कार्यालय सुर्खेतको भवनमा र सुदूरपश्चिम प्रदेशमा धनगढीमा रहेको प्रदेश सभा भवनमा मतदानस्थल कायम गरिएको छ ।

निर्वाचन अधिकृतको कार्यालयमा मतगणनाका लागि व्यवस्था मिलाइएको छ भने बुधबार साँझदेखि मतगणनाको काम हुने शर्माले जानकारी दिए । उनले भने–‘दिउँसो ३ बजे निर्वाचन सम्पन्न भइसकेपछि मतपेटिकाहरू बन्द गरेपछि सर्वदलीय बैठक हुन्छ । मतदान सकिएको तीन चार घण्टापछि नै मतगणना हुन्छ ।’

प्रतिक्रिया दिनुहोस्