एमालेको नेतृत्वका लागि मतदान जारी, यस्तो छ अहिलेको अवस्था


ओकेजनता डेस्क
१४ मंसिर २०७८, मंगलवार

काठमाडौं । नेकपा एमालेको जारी महाधिवेशनबाट सर्वसम्मत नेतृत्व चयनको प्रयास असफल भएपछि मतदान सुरु भएको छ । अहिले बिहानैदेखि सुरु भएको मतदानमा प्रतिनिधिहरुले मत हालिरहेका छन् ।

अहिलेसम्म ११५० जनाले मतदान गरिसकेको निर्वाचन आयोगले जनाएको छ । महाधिवेशनमा करिब २२०० प्रतिनिधि सहभागी छन् ।

बन्दसत्रबाट केन्द्रीय कमिटी घोषणा गर्ने सर्वाधिकार पाएका अध्यक्ष मण्डलका अध्यक्ष केपी शर्मा ओलीले घोषणा गरेको सूचीप्रति केही नेतासँगै प्रतिनिधि सन्तुष्ट नभएपछि चुनावी प्रक्रिया सुरु भएको हो ।

चुनावमा अध्यक्षका लागि निवर्तमान अध्यक्ष केपी शर्मा ओली र उपाध्यक्ष भीम रावल प्रतिस्पर्धामा छन् । त्यस्तै उपाध्यक्षका लागि ओलीले घोषणा गरेकाबाहेक घनश्याम भुसाल मैदानमा छन् । सचिवमा पनि ओलीले घोषणा गरेकाबाहेक भीम आचार्य र टंक कार्की चुनाव लडेका छन् । आचार्य यसअघि पनि सचिव थिए ।

वरिष्ठ, उपाध्यक्षमा ईश्वर पोखरेल, महासचिवमा शंकर पोखरेल र उपमहासचिवमा प्रदीप ज्ञवाली, पृथ्वीसुब्बा गुरुङ र विष्णु रिमाल निर्विरोध भएका छन् ।
सदस्यहरुमा पनि चुनाव भइरहेको छ ।

अहिलेसम्म अध्यक्षका उम्मेदवार भीम रावललगायतले मतदान गरिसकेका छन् । नौ बजेसम्म मतदान हुने कार्यतालिका छ ।

प्रतिक्रिया दिनुहोस्